အမေ့ အပြုံး
နှလုံးချိုကြည် နွေးထွေးသည်။

အမေ့ စကား
သကာ့ပျားနှယ်၊ နားဝ ချိုအိ မွှေးလှသည်။

အမေ့ မေတ္တာ
စမ်းရေဖြာသို့၊ ရင်မှာ ချမ်းမြေ့ အေးမြသည်။

အမေ့ ရင်ခွင်
ခေါင်းမှေးဝင်ကာ၊ ညစဉ်ညစဉ်
တေးသံစဉ်နှင့်၊ ပုံပြင် နားထောင်ခဲ့ဖူးသည်။

နို့ချို တိုက်ကျွေး
အမေ့သွေးနှင့် သားလေးလူလား မြောက်ခဲ့သည်။

သည်ယနေ့ထိ
အမေ့ကျေးဇူး၊ မဆပ်ဖူးသေး
ရင်မှာလေး၍၊ အကြွေးဝန်ပိ
မချိနှလုံး၊ မျက်ရည်ဖုံးကာ
ယူကြုံးမရ၊ ဗျာပါရနှင့်
သောကရစ်နှောင် တွယ်ငြိဆဲ။

သို့သော်လည်းလေ
အမေ ဆုံးမ၊ သြ၀ါဒနှင့်
ဘ၀ပင်လယ်၊ အပြောကျယ်၌
ဘယ်လောကဓံ၊ ရေစုန်ဆန်ဝဲ
ကူးခတ်ဆဲသာ၊ အောင်ပွဲတစ်နေ့ ရလိမ့်မည်။

သြော် ကျေးဇူးရှင် အမေ
မွေးရပ်မြေ၌၊ သာစေ မာစေ
ရွှင်လန်းစေကြောင်း၊ ဆုတောင်းပန်ထွာ
အလကာင်္နှင့် ဆယ်ဖြာရိုကျိုး
လက်စုံမိုး၍၊ ရှိခိုး ကန်တော့လိုက်တကား။

ငယ်ရွယ်စဉ် အခါ မသိခဲ့ရတဲ့
အမှား အမှန် ဆိုတဲ့ တရားရယ်
အပူအပင်ဆိုတာ လုံးဝမရှိခဲ့ရတဲ့
အမေ့ရင်ခွင်မှာ
ငြိမ်းချမ်းစွာ မှေးစက်ရင်း
အပြစ်ကင်းတဲ့ ကလေးလေး ဘ၀ကို
အခု အခါ သား မြင်ယောင်တမ်းတမိတယ် အမေ..

“ကမ္ဘာကြီး ကမ္ဘာကြီးကို အာဒံနဲ့ဧဝကပဲ စတယ်လို့ပြောပြော... ဗြဟ္မာကြီးလေးဦးက စတယ်ပဲပြောပြော... သူတို့ထဲမှာ အမေဆိုတဲ့ ဣတ္ထိလိင်ပါလာလို့သာ ကမ္ဘာကြီးကအဆက်မပြတ်ဘဲနဲ့ ဒီနေ့အထိကျနော်တို့အထိ သားစဉ်မြေးဆက်တွေ ဖြစ်လာတယ်မဟုတ်လားအမေ... အမေမှန်သမျှ ဘာသာခြားလူမျိုးခြားရယ်လို့  ကျွန်တော့်စိတ်ထဲမှာမရှိဘူးအမေ... သားသည်အမေတစ်ယောက်ဟာ အမေပါပဲအမေ... သူကယုတ်ညံ့လို့... သူကလူမျိုးခြားမို့လို့... သူက ဘယ်ဘာသာမို့လို့ မဟုတ်ပါဘူးအမေ မဟုတ်ပါဘူး ကျွန်တော်မြင်တာဖြင့် ကျွန်တော်ပြောဦးမယ် ကျွန်တော်လွန်သွားမလား... မလွန်ပါဘူးအမေ ကျွန်တော်စဉ်းစားထားပြီးမှ ပြောတာပါ အမေမှန်ရင်လေ အမေနားနဲ့မနာဖဝါးနဲ့နာ ပြောလိုက်ပါရစေတော့... အမေဟာ  ကျွန်တော့်လက်ထက်ထဲမှာ ကျွန်တော့်မျက်စိအောက်မှာပဲ မိန်းမရွှင်ဖြစ်နေပါစေ...... အမေဟာ အမေပါပဲ။”

                                                                            (ဆရာကြီး ဦးသုခ)